Sanxenxo busca a complicidade da Xunta para apuntalar o futuro do turismo local
Por Redacción
O alcalde de Sanxenxo, Gonzalo Pita, desprazouse esta semana a Santiago para participar nunha primeira reunión coa directora xeral de Turismo, Nava Castro, á que acudiu acompañado do edil desta materia, Jesús Sueiro e, en calidade de convidado, estivo tamén presente o presidente do Consorcio de Empresarios Turísticos (CETS), Francisco González.
Nesta primeira reunión Gonzalo Pita formulou a Nava Castro a importancia que ten para Sanxenxo resolver cuestións que non son estritamente competencias de Turismo pero que resultan fundamentais para o futuro do sector. Concretamente o alcalde referiuse ao proxecto de Seguridade Vial para a PO 308, unha estrada ao longo de cuxo trazado se suceden os establecementos hoteleiros que carecen dun servizo seguro que ofrecer ás miles de persoas que aloxan cada verán.
O rexedor local non esqueceu os problemas de seguridade que esta estrada autonómica encerra para os veciños de Sanxenxo, pero acusou a súa reforma de "vital" para que Sanxenxo continúe fidelizando aos seus visitantes, que se ven obrigados a arriscar as súas vidas cando queren acceder ás praias ou simplemente pasear, ao carecer todo o trazado entre Portonovo e A Lanzada de beirarrúas seguras.
Tanto o alcalde coma o concelleiro de Turismo trasladaron tamén a Nava Castro a gran preocupación que supón para o Goberno local a rixidez de prazos para a contratación dos socorristas que deben garantir a seguridade nas praias para que estas poidan ser distinguidas coas bandeiras azuis outorgadas pola Adeac. Unha das propostas que Pita e Sueiro deixaron sobre a mesa é a posibilidade de que o Concello de Sanxenxo poida encargarse de impartir a formación aos futuros socorristas.
Gonzalo Pita trasladou á administración autonómica a importancia de habilitar un sistema que lle permita ser máis "sensible" e flexible con municipios turísticos aos que a actual normativa lles xera inconvenientes.
O problema non lle é alleo a Nava Castro, perfecta coñecedora das interioridades dun sector punteiro en Galicia e que ten en Sanxenxo un dos seus principais bastións. Precisamente por iso, Nava Castro formulou ao alcalde a posibilidade de que os municipios turísticos galegos se unan baixo a fórmula que consideren máis eficiente para tratar de buscar unha solución conxunta a problemas que lle son comúns, mostrando así unha postura única fronte á administración.
O rexedor local tamén conversou con Nava Castro sobre a posible rehabilitación do Pazo de Quintáns, xa que o Goberno local busca liñas de financiamento que lle permitan recuperar este inmoble, á vez que traballa na idea de que poida albergar unha Escola de Turismo de alta dirección, complementaria doutros centros que as administracións públicas teñen na provincia destinados á formación de profesionais no sector.
O alcalde entregou a Nava Castro un pequeno informe no que comunica os cambios nas diferentes concellarías, vinculados ao turismo, así como unha proposta de colaboración en varios aspectos, que Nava Castro se comprometeu a estudar para concretar nos próximos meses.