A marea laranxa de Ciudadanos baixa revolta en Pontevedra
Por Redacción
As divisións internas no seo da xunta directiva de Ciudadanos en Pontevedra afloraron nos últimos días da man dun grupo de afiliados que trasladou ao comité de garantías do seu partido un escrito con supostas irregularidades ao tempo que as aireaban nos medios de comunicación.
Esta críticas foron rexeitadas frontalmente pola dirección estatal de Ciudadanos en Barcelona que avalou publicamente a traxectoria da concelleira María Rey. Ao tempo este movemento dos díscolos encontrou contestación noutro grupo de afiliados que saíu ao paso das denuncias dos seus compañeiros.
Neste sentido estes afiliados aseguran que é "mentira" que María Rey como coordinadora do partido só convocase unha reunión de afiliados dende que en 2014 se constituíu a agrupación e sosteñen que se celebraron reunións "cada dous meses", en concreto os días 3 de febreiro, 27 de abril, 2 de xuño " e pospúxose, polas vacacións, para setembro a seguinte reunión tal e como aparece reflectido na web oficial do partido".
As actas das devanditas reunións poden ser consultadas polos afiliados, aínda que falta a da última reunión celebrada na que aseguran "adoptouse a decisión de contratar dúas persoas para o partido".
Estas contratacións son outro dos argumentos que presenta a corrente crítica contra a xestión de María Rey, xa que aseguran que foi unha decisión "unilateral e arbitraria" da concelleira. Non obstante, estas mesmas fontes aseguran que a contratación "non se formalizou" e apuntan, entre outras razóns, "porque o NIF da Agrupación de Ciudadanos de Pontevedra non ten o código de conta de cotización, sen a cal non se pode facer". É dicir, carece do número Patronal ou de Inscrición á Seguridade Social.
"Esa é a segunda mentira", apuntan estes afiliados afíns a María Rey que tamén rexeitan a acusación de conivencia entre a actuación política da súa concelleira e o goberno local do BNG. Non obstante apuntan "outros intereses" por parte dos críticos. Neste sentido sinalan a "afinidade" dos díscolos e a súa nova xunta directiva co Partido Popular.