Máis de 15.000 persoas ao día nas praias de Sanxenxo durante o mes de xullo
Por Redacción
Durante o mes de xullo as praias de Sanxenxo recibiron unha media diaria de usuarios superior aos 15.200.
Son datos dunha estatística elaborada polo servizo de Salvamento en Praias nos 14 areais nos que está presente.
Entre todas as cifras destaca a alta afluencia á praia de Silgar, cunha media de 4.745 bañistas ao día e picos que superaron os 10.000 durante algunha xornada de fin de semana.
O segundo areal máis concorrido foi Montalvo (2.196), seguido de Areas (1.720), Baltar (1.553), A Lanzada no tramo pertencente a Sanxenxo (880), Major (656), Caneliñas (402), Foxos (379), Pragueira (337), Paxariñas (296), Bascuas (292) e Lapa e Area Gorda (263 usuarios).
Este informe indica ademais que os 50 socorristas e sanitarios do servizo de Salvamento realizaron duramnte o mes de xullo 2.531 intervencións, na súa maioría por feridas causadas por ourizos (671), picaduras de fanecas (145), tomas de tensión (104) ou avisos en zonas de baño e a cans (613).
"Estes datos confirman que a nosa costa segue a ser un lugar preferente para milleiros de persoas que escollen as nosas praias para gozar do seu tempo de lecer", sinalaron dende o goberno local tras coñecer a estatística de asistencia aos areais.