O PP quere que as ambulancias teñan un corredor libre de 'lombos' para chegar a Montecelo
Por Redacción
O grupo municipal do PP entende que non existe xustificación algunha para a instalación de lombos nas estradas do entorno do Hospital Montecelo e insisten na necesidade de crear un corredor libre destas medidas de calmado do tráfico para servizos de urxencia, que "permita trasladar ao paciente coa maior brevidade posible, xa que en moitas ocasións o factor tempo é crucial".
O concelleiro José Luis Martín fai esta proposta a través dun comunicado de prensa logo de analizar o estudo de mobilidade para Montecelo realizado pola Policía Local de Pontevedra, que conclúe que preto do 80% dos vehículos que transitan por este entorno respectan o límite de velocidade de 30 km/h, e case o 97% dos condutores que acceden ao hospital de Montecelo non superan o límite de 40 km/h.
O concelleiro fai referencia a este estudo para indicar que dende o seu partido están de acordo con mellorar as beirarrúas e accesos a Montecelo, pero rexeitan a medida que quere levar a cabo o Goberno de Lores coa instalación de lombos neste vial. "Entendemos que a instalación de lombos debe seguir un plan específico e ser adaptado á normativa do Regulamento Xeral de Circulación", puntualizou.
O PP tamén critica a proposta do Goberno local de incrementar o número de prazas para persoas con mobilidade reducida de catro a nove, pois asegura que non cumpre co mínimo esixido, que se fixa nunha destas prazas por cada 40 das outras. Segundo indican, na actualidade, Montecelo ten 418 prazas de estacionamento e tan só o 2,15% están destinadas a persoas con discapacidade.
Os 'populares' manterán nos vindeiros días varias reunións con diversos colectivos con implicacións neste tema.
Relacionadas:
-
Técnicos de ambulancias alertan de 46-48 lombos que "perjudican" o seu traballo, segundo o PP
Por Natalia Puga |
-
Moreira reitera ante o xerente do CHOP a súa oposición aos lombos nos accesos a Montecelo
Por Redacción |
-
"Total sintonía" entre Concello e Deputación para reformar o acceso a Montecelo e Príncipe Felipe
Por Alejandro Espiño & Mónica Patxot |
-
O PSOE propón a eliminación ou rebaixa de 49 lombos para crear cinco vías de ambulancias a Montecelo
Por Redacción |
-
Técnicos do 061 trasladan ao Partido Socialista a súa oposición a construción de lombos en Montecelo
Por Redacción |
-
O Concello estuda medidas para eliminar aparcadoiros irregulares en Montecelo
Por Redacción |
-
Proxéctase a mellora da seguridade peonil en Montecelo coa construción de beirarrúas
Por Redacción |