Denuncian que sete policías de Vilagarcía foron agredidos en acto de servizo no último mes
Por Redacción
O sindicato Unión Federal de Policía (UFP) denunciou publicamente este martes que sete axentes da Comisaría da Policía Nacional sufriron unha agresión en acto de servizo no último mes. Os feridos están de baixa laboral, provocando que as instalacións estean por debaixo de mínimos.
A última agresión produciuse o pasado venres 19 de xuño, pero o que denuncia UFP é que "se empeza a converter en algo habitual, que é a falta de policías en Vilagarcía que dean a presenza suficiente como para disuadir os delincuentes de actuar".
O sindicato policial denuncia que levan avisando máis dun ano, pedindo, reclamando e mobilizándose na rúa ante unha situación que "se alguén non o remedia, rematará en desgracia tarde ou cedo". De feito, xa hai un ano pediron 20 policías urxentemente para Vilagarcía e, malia que o pediron "por activa e por pasiva", tan só se ampliou o equipo nun axente.
En opinión dos sindicalistas, a situación é "unha tomadura de pelo" tanto para os Policías coma para os cidadáns de Vilagarcía. Tamén mostran o seu malestar coa actitude dos xefes de Vilagarcía, pola súa "falta total de comprensión e apoio aos seus policías", aos que negan permisos, poñen problemas para as vacacións e ata lle abren expedientes a aqueles que protestan ante unha situación que "xa non se sostén por ningún lado".
Ante tal situación, dende a UFP anuncian que solicitarán o cesamento dos xefes da Comisaría de Vilagarcía e van esixir responsabilidades. Están dispostos a chegar aos tribunais contra os responsables de "tanta desidia e pasotismo".