O sindicato UFP opta por informar directamente o subdelegado da falta de policías
Por Redacción
O sindicato Unión Federal de Policía (UFP) denunciou varias veces nos últimos meses a falta de medios humanos nas comisarías da Policía Nacional na provincia de Pontevedra, a última esta mesma semana. Malia todo, segundo indican, o subdelegado do Goberno, Antonio Coello, segue asegurando que non tiña constancia desa situación, de modo que agora optaron por informalo directamente.
Tras recibir con "estupor e sorpresa" a noticia de que Coello non coñecía esta falta de policías, este xoves entregaron un escrito por Rexistro na Subdelegación do Goberno "para que xa non lle quede ningunha dúbida máis desta situación". No documento, o secretario provincial de UFP, Carlos Rodríguez Losada, recorda que xa denunciou reiteradamente a diminución de efectivos nas distintas comisarías e, como resposta, tan só se aumentou unha praza en cada centro de traballo para a categoría de Policía.
Carlos Rodríguez recorda que a Comisaría de Vilagarcía é "a máis problemática en carencia de persoal", pois sufriu durante os últimos tres anos unha diminución de efectivos, de maneira que se foi perdendo progresivamente persoal ano tras ano. De todos os xeitos, a situación é xeneralizada en toda a provincia, onde a falta de recursos humanos "é flagrante".
O escrito entregado á Subdelegación recolle a súa preocupación por este "claro déficit de funcionarios" e o que pode levar consigo na deterioración da protección da seguridade cidadá. Como posible solución para "paliar esta delicada situación" propoñen que se publiquen Comisións de Servizo temporais, nas mesmas condicións nas que se desenvolveron noutras Comisarías de España, como Palencia, Alxeciras, Ceuta ou Melilla.
Relacionadas:
-
Crean unha soa praza de oficial de Policía Nacional para a Comisaría de Pontevedra
Por Redacción |
-
Denuncian un "trato ditatorial e persecutorio" cara ao persoal por parte da nova xefatura da Comisaría de Vilagarcía
Por Oskar Viéitez |
-
Denuncian que sete policías de Vilagarcía foron agredidos en acto de servizo no último mes
Por Redacción |
-
Critican o "desinterese" da Administración ante a "precaria" situación da falta de policías
Por Redacción |