Reclaman a reapertura "canto antes" do arquivo histórico e a biblioteca do Museo de Pontevedra
Por Alejandro Espiño
Coincidindo co Día Internacional dos Arquivos, a asociación Amigos do Museo de Pontevedra reclama a inmediata reapertura da biblioteca e a sala de investigadores do museo provincial, situadas no edificio Fernández López. Levan pechadas ao público dende hai case tres anos "impedindo a función investigadora que todo Museo debe ter en tanto centro de investigación, propiamente dito", sinalou o seu voceiro Ernesto Vázquez-Rey Farto.
Este peche, ordenado por "decisión política" da Deputación, impide que os fondos do arquivo do museo, que conta con documentación "moi boa, moi antiga e moi pouco coñecida", poidan ser consultados no propio edificio.
Tampouco hai acceso, denuncian, unha biblioteca que conta con preto de 6.000 títulos e máis de 150.000 rexistros bibliográficos catalogados.
Impídese así, segundo Ernesto Vázquez-Rey, que ambos os dous servizos poida funcionar como estaban planificados, como "centro de documentación, investigación e transferencia de coñecemento"
Estes feitos enmárcanse, apuntan dende a asociación, no interese da Deputación por habilitar no Edificio Sarmiento un "punto único de consulta" centralizando toda esta documentación no arquivo administrativo da administración provincial.
"É un erro histórico", asegura este voceiro, porque supón "poñer ao mesmo nivel un arquivo histórico de primeira magnitude cun arquivo puramente administrativo".