Os sindicatos concéntranse contra o peche de 98 camas durante o verán nos hospitais públicos da área sanitaria
Por Redacción
Un grupo de ao redor de trinta traballadores do Complexo Hospitalario de Pontevedra concentráronse na mañá deste luns 1 de xuño para denunciar o peche masivo de camas na área sanitaria norte da provincia. Na concentración convocada pola xunta de persoal que está liderada polo colectivo Prosagal, cuxos delegados non estiveron presentes na protesta, a anterior presidenta do colectivo, Carmen Revenga denunciou que "con las listas de espera que tenemos no se pueden cerrar camas en verano. Implica derivación a centro concertados, la no contratación y la sobrecarga de los trabajadores". Sinalan que aumentarán as listas de espera se non se deriva a centros concertados ante a previsión do peche de 98 camas durante o período estival nos Hospitais de Pontevedra e O Salnés.
Neste sentido, Cándido Sartier, de Traballadores da Sanidade Pública (TSP), engadiu que se seguen mantendo o concerto co Hospital Domínguez mentres se pechan camas e se perden 300 contratos e engadiu que lle parecía "chamativo" que o actual xerente, José Manuel González, cando foi conselleiro de Sanidade obrigara ao entón xerente Rey Aneiros a reducir á metade o peche de 120 camas.
Rocío Graña, da CIG, sinalou que xa se pecharon servizos como a medicina interna, pediatría e lactantes, oncoloxía e esperan que tamén se peche, como durante o verán de 2014, o servizo de traumatoloxía en Montecelo ademais de parte de cirurxía. Tamén apuntou que agora "pides unha cita e cha dan para dentro de 6 meses ou un ano" e engade que "cando pase o verán o que farán será sacar as listas, con consultas a correr sen tempo para os médicos para valorar os pacientes".
Dende o colectivo sindical entenden que se está a beneficiar á sanidade privada e rexeitan a escusa de que non hai diñeiro para cubrir as vacantes. Carmen Revenga sinalou neste sentido que "ahora quieren enviar el 061 a A Estrada con una inversión de 13,5 millones de euros. Si no tienes para comer, no te compres una televisión de plasma". Reclaman, ademais, a potenciación da sanidade primaria e unha boa planificación que evite o enriquecemento de centros privados "a costa de lo público".
Os sindicatos manterán unha asemblea para decidir se continúan con concentracións de protesta ou levan a cabo actuacións máis contundentes de denuncia.
RESPOSTA DO SERGAS
Pola súa parte, dende o Complexo Hospitalario xustifican a reordenación estival polos menores índices de ocupación hospitalaria durante os meses do verán. E engaden que no verán de 2014, nos Hospitais públicos de Pontevedra houbo unha media diaria de 141 camas libres, sobre o número de camas operativas.
Apúntase ademais que as camas non operativas poden activarse de manera inmediata, para dar resposta a calquera situación de aumento da demanda asistencial.
Relacionadas:
-
Xerencia e traballadores manteñen abertas as súas discrepancias polo peche de camas
Por Oskar Viéitez |
-
José Manuel González nega que se pechen servizos nos hospitais de Pontevedra durante o verán
Por Redacción |
-
Os hospitais de Pontevedra e O Salnés pecharán o 13,7% das camas este verán
Por Redacción |