José Manuel González nega que se pechen servizos nos hospitais de Pontevedra durante o verán
Por Redacción
O xerente do Complexo Hospitalario de Pontevedra, José Manuel González, respondeu ás críticas dos sindicatos que están a levar a cabo protestas polo peche de camas nos hospitais da área norte de Pontevedra.
"É un tema manido porque usan os mesmos argumentos dende hai 20 anos. Faise noutras comunidades autónomas, dá igual quen goberne. É un tema de eficiencia de recursos, non é un tema de recortes nin cousa parecida. Non se poden ter camas que non se van utilizar", apuntou o responsable dos hospitais de Pontevedra que engadiu que "no 2014 se reorganizou un número de camas similar ao deste ano e tiñamos 140 camas libres no hospital todos os días. A actividade no hospital non depende do número de camas, senón de que haxa recursos humanos que traballen e quirófanos e outras cousas. Non son as camas as que determinen a actividade sobre todo en épocas onde non hai médicos".
Segundo expón José Manuel González, o problema derívase da falta de médicos especialistas para substituír aos que se van de vacacións: "eu non discuto que haxa enfermeiras e celadores en paro, pero non hai médicos". Engadiu que igual que sucedeu o pasado verán no Hospital do Salnés en caso de que nun momento concreto se precisen camas, ábrense en menos de 24 horas. "Sería unha irresponsabilidade ter camas baleiras sabendo que non se van utilizar. O que non é sensato é que teñamos 10 camas libres na primeira planta, tres na segunda, cuatro na cuarta... o normal é reorganizar para aproveitar os recursos".
En canto ao peche de servizos hospitalarios que denuncian os representantes sindicais, González aclarou que "non se pecha ningún servizo. Iso significaría que os pacientes que veñen cunha patoloxía non se van atender e non é así". Indicou que o que se realiza é unha reorganización de maneira que, por exemplo, os pacientes dunha especialidade determinada como traumatoloxía, en lugar de ingresar na planta sexta serán trasladados á quinta, pero serán atendidos igual durante os meses de verán.
Relacionadas:
-
Xerencia e traballadores manteñen abertas as súas discrepancias polo peche de camas
Por Oskar Viéitez |
-
Os sindicatos concéntranse contra o peche de 98 camas durante o verán nos hospitais públicos da área sanitaria
Por Redacción |
-
Os hospitais de Pontevedra e O Salnés pecharán o 13,7% das camas este verán
Por Redacción |