Os hospitais de Pontevedra e O Salnés pecharán o 13,7% das camas este verán
Por Redacción
A planificación prevista polo Servizo Galego de Saúde (Sergas) para este verán na rede de hospitais públicos de Pontevedra e O Salnés prevé o peche dunha media do 13,76% das camas hospitalarias, o que supoñerá que 98 non estarán operativas.
A Consellería de Sanidade resalta nun comunicado que, en caso de ser necesarias, as camas poderían activarse "en calquera momento" e subliña que o 86,12 por cento de camas que permanecerán operativas durante este verán en toda Galicia está "en liña cos anos anteriores".
O departamento que dirixe Rocío Mosquera incide en que "todos os recursos do Sergas estarían dispoñibles para ser utilizados en casos de necesidade que se poida producir de forma moi excepcional", e exemplifica esta garantía co dispositivo despregado hai dous anos para asistir ás vítimas do accidente ferroviario de Angrois, cando se activaron e se utilizaron todos os recursos que foron necesarios".
MENOS INGRESOS E VACACIÓNS
Sanidade subliña que a medida de pechar camas hospitalarias en verán se xustifica polos menores índices de ocupación hospitalaria na época estival, debido sobre todo a unha redución estacional de patoloxías e á correlativa redución de ingresos por enfermidade. Así mesmo, o verán é o período máis demandado polo persoal para tomar as súas vacacións.
A administración autonómica sanitaria subliña que, ao longo dos últimos cinco anos, entre 2010 e 2014, a porcentaxe media de ocupación de camas durante o verán nos centros de Sergas "nunca" superou o 76,8 por cento. Ademais, aprovéitase esta época para facer obras de mantemento nos centros.
Relacionadas:
-
Xerencia e traballadores manteñen abertas as súas discrepancias polo peche de camas
Por Oskar Viéitez |
-
José Manuel González nega que se pechen servizos nos hospitais de Pontevedra durante o verán
Por Redacción |
-
Os sindicatos concéntranse contra o peche de 98 camas durante o verán nos hospitais públicos da área sanitaria
Por Redacción |