Un simulacro pon a proba a capacidade de resposta do persoal da Casa das Campás
Por Redacción
Aínda que se trata do espazo con menos persoal do campus de Pontevedra, a Casa das Campás constitúe tamén un punto clave no labor de formación e prevención ante posibles incidencias que realiza o Servizo de Prevención de Riscos Laborais da universidade. Non en van, trátase dun inmoble onde se organizan con frecuencia unha serie de actos que reúnen a numeroso público.
De aí a importancia de que todo o persoal que traballa na sede da Vicerreitoría saiba como actuar ante unha emerxencia, que era precisamente o propósito do simulacro desenvolvido este martes, no que foi preciso desaloxar estas instalacións tras detectarse un hipotético incendio que non era posible extinguir.
O vicerreitor Juan Manuel Corbacho destacou a coordinación amosada por todo o persoal neste simulacro, que avaliou como moi positivo.
"Evidentemente na vida real os nervios son outros, pero, cando menos vas interiorizando os pasos que tes que dar ante unha posible emerxencia, para así intentar minimizar as súas posibles consecuencias", concluíu.