As alfombras florais locen na procesión do Viático
Por Redacción
A procesión do Viático volveu saír este domingo da Real Basílica de Santa María la Mayor e luciu como nos seus mellores días sobre as alfombras florais elaboradas durante toda a noite por varias decenas de veciños do barrio da Moureira.
O bo tempo permitiu que as flores utilizadas para a decoración presentasen o seu mellor aspecto e animou os fieis a participar no percorrido da comitiva relixiosa entre a avenida de Santa María e a capela de San Roque, tanto acompañando esta coma presenciando o percorrido na rúa.
A procesión saíu de Santa María pasadas as 10.30 horas e percorreu a avenida de Santa María, Xan Guillerme, Jofre de Tenorio, praza de Concepcion Arenal, Alfonso XIII, Echegaray, paseo de Colón, Monteleón, Almirante Matos, campo da Torre, Juan Villaverde, e Irmáns Nodal, recolléndose na Capela de San Roque, dende onde se impartiu a bendición. Os momentos nos que contou coa presenza de máis fieis foron a zona de Santa María que fora alfombrada e o final do percorrido.
Durante toda a procesión un piquete de alumnos da Escola Naval Militar de Marín escoltou a Custodia que porta a Jesús Sacramentado baixo palio e a banda de música da Escola pechou o cortexo.
A tradicional procesión está organizada polo Gremio de Mareantes en colaboración coa Real Basílica de Santa María La Mayor para levar a comuñón aos enfermos e impedidos da devandita parroquia.