O ámbito da igrexa da Lama gaña en accesibilidade
Por Redacción
As obras de mellora e asfaltado do ámbito da igrexa da Lama están a punto de finalizar. Os traballadores da empresa adxudicataria están a executar xa os traballos para substituír a capa de rodadura existente cunha nova, toda vez que a previa estaba moi deteriorada polo paso do tempo e a acción dos vehículos.
O Concello da Lama indicou a través dun comunicado que estes traballos forman parte dos compromisos adquiridos polo alcalde, Jorge Canda Martínez, cos veciños do núcleo urbano da Lama co fin de mellorar o acceso rodado ás inmediacións do templo eclesial sobre todo cando se celebran actos litúrxicos aos que adoita acudir un bo número de persoas.
Máquinas estendedoras e de aplicación de asfalto en quente ultiman os labores co fin de deixar a zona en perfectas condicións sobre todo ante a proximidade da celebración da Festa do Codillo da Lama que terá lugar na Alameda o próximo 10 de maio.
Operarios de limpeza municipais tamén están a proceder ao acondicionamento das inmediacións da praza empedrada da Alameda co fin de que todo estea en perfecto estado para a celebración do evento
O xurado encargado de realizar a cata previa á celebración da Festa do Codillo decantouse, por unanimidade dos seus membros, pola prepación en salsa de curri e mazá con gornición de navicol e patacas asadas presentada pola empresa Grupo Galego de Cátering Arelas, de Vincios (Gondomar).
As máis de medio millar de porcións previstas pola organización, ademais do popular e saboroso codillo, van acompañados de pan e viño, así como un prato de barro e servizos co fin de poder favorecer a degustación deste manxar que dende hai anos se homenaxea e exalta na Alameda da Lama. As porcións de codillo, pan e viño terán un prezo popular de 10 euros para favorecer a participación cidadá que prevé superar as cifras da edición pasada.