Un matrimonio de construtores condenado por apropiarse do diñeiro dun cliente en Cotobade
Por Oskar Viéitez
Juan Carlos B.C. e Josefa P.C., foron condenados pola Audiencia de Pontevedra a un ano de prisión por apropiarse do diñeiro que lles entregou un veciño de Cotobade para construír unha vivenda.
Este matrimonio de empresarios recoñeceu os feitos tras chegar a un acordo de conformidade coa Fiscalía polo que se lles rebaixou a petición inicial de pena que se elevaba ata os catro anos de prisión.
Igualmente a multa reduciuse de tres mil euros ao pagamento dunha cota de tres euros diarios durante seis meses.
Tras elevarse a firme a sentenza decláranse como feitos probados que a vítima lles achegou, entre os anos 2009 e 2010, ata 75.000 euros que se quedaron os acusados xa que nin siquera adquiriron os materiais necesarios para continuar a obra que deixaron abandonada cando só executaran un 36% desta.
Ambos os dous indemnizarán conxunta e solidariamente á vítima na cantidade de 47.000 euros, dos que xa achegaron 8.000.
O tribunal tivo en conta este atenuante de reparación do dano causado pero tamén a circunstancia agravante de reincidencia no caso deste matrimonio, xa que en xuño do 2009, asumiron dous anos de cárcere na Audiencia de Pontevedra por apropiarse indebidamente do diñeiro xerado pola venda dun terreo e que terían que ter destinado á compra dunha vivenda.