Anuncian a licitación das obras de mellora da seguridade viaria na travesía de Carballedo
Por Redacción
A conselleira de Medio Ambiente, Territorio e Infraestruturas, Ethel Vázquez, anunciou a licitación das obras de mellora da seguridade viaria da travesía de Carballedo, en Cotobade, por un importe de preto de 100.000 euros.
Vázquez trasladoulle este compromiso ao rexedor municipal, Jorge Cubela, no transcurso dunha reunión celebrada este luns, na que lle adiantou que o Diario Oficial de Galicia publicará este martes o contrato de obra na estrada Ponte Bora-Carballedo.
A conselleira salientou que a importancia desta actuación radica no feito de que favorecerá a accesibilidade dos máis de 4.300 veciños de Cotobade e contribuirá a que esta travesía sexa máis segura e transitable. Salientou que para mellorar o servizo nesta estrada executaranse novas beirarrúas, mellorarase o deseño nas interseccións e construiranse pasos peonís e de acceso a garaxes.
BALNEARIO DE SAN XUSTO
A conselleira tamén anunciou que o departamento que dirixe vén adxudicar a redacción do proxecto de recuperación patrimonial, etnográfica e paisaxística do balneario de San Xusto, parroquia de San Xurxo de Sacos.
A conselleira de Medio Ambiente sinalou que se trata dunha zona cargada de historia e de elementos de gran valor arquitectónico e paisaxístico, como o balneario de San Xusto e a zona das bañeiras, as fontes de auga, catro muíños e os seus canais de auga, camiños históricos, a ponte romana, medieval e o camiño empedrado a Fentáns.