O caldense Jesús Goldar volve ao Parlamento
Por Redacción
Jesús Goldar Güimil xa volve ocupar un sillón no Parlamento de Galicia. O caldense tomou posesión este martes como deputado autonómico do Partido Popular pola provincia de Pontevedra en substitución de Román Rodríguez González, que recentemente deixou o seu escano ao ser nomeado conselleiro de Cultura, Educación e Ordenación Universitaria.
A toma de posesión oficializouse no Pleno do Parlamento de Galicia e supón o regreso de Goldar Güimil a un cargo que xa ocupou na VIII Lexislatura, entre os anos 2009 e 2012.
Jesús Goldar Güimil, veciño de Caldas de Reis, naceu en 1972, está casado e ten un fillo. O xa deputado autonómico cursou estudos de Dereito e é concelleiro e portavoz municipal do Partido Popular en Caldas de Reis desde 1999.
Goldar encabezou a candidatura do PP en Caldas nos dous últimos comicios municipais, en 2007 e 2011. Recentemente o PP anunciou que non repetirá como candidato nas vindeiras municipais do 24 de maio, senón que a candidatura conservadora estará liderada por Manuel Cortés.