Denuncian que pretenden expedientar un policía de Sanxenxo "por non mostrar a debida sumisión"
Por Anxo Lourido
O sindicato Comisiones Obreras denunciou unha actuación de "abuso de poder de mandos da Policía Local de Sanxenxo" a raiz da tramitación dun expediente grave a un axente do corpo despois de que mantivese, en novembro de 2014, unha discusión cun mando pola conveniencia de realizar o debuxo dun accidente de tráfico. A pesar de que o axente, tras mostrar a súa discrepancia, obedeceu a orde iniciouse o proceso sancionador que se se se lle aplica o réxime disciplinario xeral podería levar consigo un castigo dun ano sen emprego e soldo.
José Luis García Pedrosa e José Ramón Piñeiro, representantes de CC.OO., acompañados por axentes da Policía Local de Sanxenxo, ofreceron unha rolda de prensa na que reclamaron a intervención da alcaldesa da vila turística, Catalina González, para evitar que se abra este expediente. Sinalan que solicitaron unha audiencia e que a rexedora a rexeitou ata que remate a tramitación do expediente, que neste momento se encontra na fase de toma de declaración de testemuñas. O sindicato denuncia que as testemuñas que declaran non son presenciais e que "minten descaradamente para poñerse ao lado dos que mandan", segundo denunciou José Ramón Piñeiro.
O expediente recolle, segundo CC.OO., que "non mostrou a debida submisión", unha frase que José Luis García Pedrosa considera que forma parte dunha terminoloxía doutra época. Piñeiro tamén indicou que esta situación se debe á caza de bruxas que existe dentro da comisaría entre a maioría dos axentes e o bando dos mandos e persoal de oficina.
Anuncian que iniciarán un calendario de protestas con concentracións que comezarán o venres 27 ás 11.30 horas ante o edificio do Concello para reclamar que se arquive este caso. García Pedrosa apuntou a que o servizo xurídico do sindicato presentará alegacións e que acudirán ao contencioso-administrativo en caso da tramitación continúe.
Polo momento, o goberno local declinou facer declaracións sobre este tema.