A Deputación destinará 450.000 euros a proxectos de atención social especializada
Por Redacción
A Deputación de Pontevedra destinará unha liña de axudas de 450.000 euros a entidades sen ánimo de lucro que traballan en proxectos e iniciativas de atención social especializada.
O organismo provincial anunciou este sábado que publicará nos próximos días as bases que regulan as axudas e que establecen que as entidades que traballen a prol dos colectivos máis vulnerables poderán beneficiarse de axudas de ata 6.000 euros para o financiamento das iniciativas que realicen para promover a integración destas persoas e favorecer o desenvolvemento normal da súa vida cotiá.
Poderán solicitar achegas de ata 1.000 euros para cubrir gastos propios do funcionamento da entidade, entre os que se inclúen os gastos correntes. Esta axuda ten por obxecto facilitar o mantemento destas entidades que desempeñan unha gran labor social e de apoio a múltiples colectivos como infancia, adolescencia e xuventude; persoas maiores con dependencia ou risco social; persoas con discapacidade; con problemática social derivada de enfermidades mentais; familias en risco de exclusión social; vítimas de violencia de xénero; drogodependentes ou inmigrantes, entre outros moitos.
Con cargo a este programa poderanse subvencionar actividades orientadas a promover o desenvolvemento integral de diferentes colectivos; favorecer a integración social das persoas en risco de exclusión, proporcionándolle medios e recursos para que poidan desenvolver unha vida normalizada no seu contorno habitual; ou atender as necesidades básicas, como a adquisición de produtos de primeira necesidade, farmacéuticos e doutro tipo, así como servizos imprescindibles para o normal desenvolvemento da vida diaria, entre outras.
O prazo para acollerse a esta liña de axudas estará aberto ata o 2 de febreiro de 2015.