Un simulacro de derrame de metanol pon a proba ao Porto de Vilagarcía
Por Redacción
Este xoves desenrolouse un simulacro do Plan de Emerxencia Exterior (PEE) de Finsa-Foresa nas instalacións que ten a compañía no peirao de Vilagarcía.
O exercicio consistiu en simular un derrame de metanol como consecuencia da rotura da líña de saída do tanque no interior da planta, producíndose un incendio con charco, cun tempo de duración da fuga de 20 minutos.
De xeito inmediato, a empresa activa o seu Plan de Emerxencia Interior coa participación da súa brigada de intervención e dos efectivos de bombeiros de Vilagarcía.
De forma case simultánea activouse tamén o Plan de Emerxencia do propio Porto de Vilagarcia e finalmente activouse o Plan de Emerxencia Exterior elaborado e dirixido dende a Xunta de Galicia.
O director xeral de Emerxencias e Interior, Luis Menor, encargado de dirixir todo este complexo dispositivo, salientou a importancia que teñen este tipo de exercicios, xa que dan a coñecer a potencial poboación afectada as medidas de autoprotección a aplicar en caso dun incidente. Así mesmo, permiten unha coordinación efectiva entre as administracións, o porto de Vilagarcía e a empresa para garantir unha maior seguridade na zona.