Luciano Sobral presenta o equipo co que o BNG quere revalidar a alcaldía de Poio
Por Oskar Viéitez & Mónica Patxot
Coa mesma ilusión que o primeiro día pero coa experiencia de quen aspira a un sexto mandato, Luciano Sobral presentou ao equipo co que pretende a revalidar a alcaldía de Poio.
O BNG márcase o obxectivo de lograr a maioría absoluta pero iso non significa pechar ningunha porta a un novo goberno coaligado co Partido Socialista xa que recalcaron que "malia ter unha visión diferente de ver o país, existe certa sintonía á hora de traballar".
Xunto a Luciano Sobral, como número dous da lista figura Xulio Barreiro, actual edil de Urbanismo e Facenda. Séguelle Silvia Díaz, responsable de Cultura; e a continuación figura o concelleiro de Turismo e Persoal, José Luís Martínez; a edil de Deportes e Festexos, Marga Caldas; de Benestar Social e Igualdade, Lidia Salgueiro; e de Servizos, José Ángel Lodeiro.
Hai que esperar ata o oitavo posto para atopar as primeiras novidades, son: María Xosé Carballa e Francisco Acuña, que ocupa o noveno posto, que marcaría a maioría absoluta.
Por motivos persoais a edil de Educación, Alicia Martínez, partirá no posto 17 e sairá da corporación municipal.
Aínda que a presentación do programa electoral está prevista para outro día, Luciano Sobral avanzou como prioridades para un novo mandato a necesidade de completar o PXOM, mellorar a seguridade da PO-308, dotar a Poio dun vial alternativo a esta estrada da costa que funcione como "unha nova arteria", completar a depuración da ría, facer realidade o polígono de Fragamoreira, dotar ao municipio de novas infraestruturas deportivas, construír unha nova escola infantil e mellorar os centros actuais e tamén un impulso na área dos Servizos Sociais.