Os socialistas piden a Cubela que paralice o 'catastrazo' de Cotobade
Por Redacción
O PSdeG-PSOE de Cotobade pide ao alcalde, Jorge Cubela, que paralice unha suba do valor catastral que está a promover e "abra un proceso de negociación máis xusto" para a vecindade.
Para os socialistas, este 'catastrazo' é un abuso e un "auténtico atentado" contra os veciños da localidade que se aprobou xusto despois de que no último Pleno da Corporación se aprobasen dúas exencións o 50% da taxa para as familias numerosas e para aqueles que teñan que pagar menos de 10 euros.
Segundo sinalan, a taxa do IBI vai supor un aumento do 75% de media, xa que a recadación que se vai facer con este imposto vai pasar dos 190.000 euros cobrados no 2014 aos 332.000 euros no próximo ano. "Isto vai supor que o 40% do orzamento do concello de Cotobade vai a ser grazas a suba do IBI aos veciños e veciñas", denuncian.
O PSdeG-PSOE de Cotobade fixo unha campaña polas casas explicando o que ía supor o incremento e recolleu case mil firmas contra este aumento. Considera que o alcalde, Jorge Cubela, "só quere subir os impostos da vecindade para poder pagar a aportación municipal ás obras do novo centro de saúde de Carballedo".