Que hai do meu? Os traballadores preguntan polo diñeiro que lles debe o Fogasa
Por Oskar Viéitez
As sedes dos sindicatos están a rexistrar estes días un aluvión de consultas telefónicas por parte de traballadores con pagamentos pendentes por parte do Fondo de Garantía Salarial (Fogasa). Trátase de salarios e indemnizacións por despedimento dos traballadores de empresas insolventes que o Fogasa pretende aboar antes do día 10 deste mes.
Son uns 954 millóns de euros que se aboarán en cinco pagamentos, para o que contará cun crédito suplementario de 940 millóns de euros, segundo trasladou os sindicatos a secretaria de Estado de Emprego, Engracia Hidalgo. Unha cantidade que a Confederación Intersindical Galega (CIG) ve "insuficiente" para resolver o problema xerado na provincia de Pontevedra.
Dende este sindicato CIG aseguran que a provincia de Pontevedra é "unha das máis prexudicadas" con ata 16 meses de atrasos que afectan a máis de 10.000 traballadores.
Pontevedra é "unha das máis prexudicadas" con ata 16 meses de atrasos
Os expedientes atrasados aboaranse en cinco pagamentos, algúns deles xa están ingresados, centrándose todas as datas estimadas con anterioridade ao día 10. Tras o quinto pagamento efectuarase un último cos expedientes resoltos entre o 1 e o 15 de decembro, ata a execución total do presuposto, por un importe de 50,3 millóns de euros.
"ÿ certo que están a pagar, pero non todo o solicitado", dixo o secretario de CIG na bisbarra de Pontevedra, Marcos Conde. A central nacionalista convocou a unha asemblea informativa para o próximo xoves día 11, ás 19:00 horas, no edificio de sindicatos para aclarar todas as dúbidas que se formulen.
Aínda que dá a "benvida" a esta iniciativa, Marcos Conde advertiu que "isto non soluciona para nada o problema" xa que a medida está a ser "chapucerilla e precipitada" e necesitará a revisión de multitude de expedientes para a corrección de erros, e o diñeiro destinado será "insuficiente para afrontar a totalidade dos pagamentos".
Por este motivo dende a CIG sinalan a necesidade de ampliar o equipo do Fogasa para resolver todos estes expedientes e reclaman que os Presupostos Xerais do Estado destinen a cantidade necesaria para corrixir estes atrasos.
Relacionadas:
-
Un cento de afectados polo atraso de pagamentos do Fogasa concéntranse ante a Subdelegación
Por Redacción |
-
O Ministerio de Emprego reclama cartos a parados que aínda non recibiron o pagamento do Fogasa
Por Redacción |
-
O atraso no pagamento das indemnizacións do FOGASA leva á CIG a convocar protestas
Por Redacción |
-
O FOGASA acumula máis de 9.000 expedientes á espera de resolución
Por Anxo Lourido |