Boas expectativas para o marisqueo na Ría de Pontevedra
Por Oskar Viéitez
A presidenta da Asociación de Maricadoras da Pé da Confraría de San Telmo, Marina Buceta, confirmou que as expectativas para este mes de decembro son boas, á espera de que o mercado responda cuns bos prezos.
De momento as confrarías xa solicitaron un aumento da cota, a cinco quilos de xapónica e tres de ameixa fina.
Non obstante, este mes as mellores mareas cadran moi mal, "sempre en sábados e domingos", polo que decidiron aprazar o marisqueo para outros días nos que tamén poida abrir a lonxa. "Tamén nos cadra a marea en Nadal e Fin de Ano", comentou Marina Buceta.
Con todo a presidenta das mariscadoras cre que van poder traballar "doce ou trece días este mes".
Se durante ese tempo as mariscadoras comproban que non poden completar estas cotas ou que os prezos son baixos reducirían a cantidade de molusco a recoller.
Ademais os bancos marisqueiros de Pontevedra non se encontran moi ben "porque agora mesmo aquí ven moitísima xente", isto é debido a que Os Praceres e Raxó están catalogados como Zona C debido á presenza de bacterias coliformes, o que impide a venda da ameixa para consumir en fresco.
Ao traballar as tres confrarías do fondo da ría nun plan de explotación conxunto, a existencia de zonas C provoca que o 70% das mariscadoras coincidan traballando no banco marisqueiro de Pontevedra, mentres que o 30% restante van a Lourizán.
Pero polo menos o mes de decembro parece libre das toxinas que marcaron este ano 2014 no que de 150 días solicitados polas tres confrarías no Plan de Expotación tan só faenaron 118 por culpa da marea vermella.
Relacionadas:
-
Convocan 34 novos permisos de marisqueo nas confrarías de Pontevedra, Lourizán e Raxó
Por Redacción |
-
As mariscadoras de Lourizán paran a actividade na depuradora ante unha vertedura de residuais en Praceres
Por Redacción |
-
As lonxas do fondo da ría de Pontevedra queren que a Deputacion as promocione
Por Redacción |