Resolven o asalto a unha anciá de Tomeza e atribúeno a un grupo criminal
Por Natalia Puga
Axentes das Unidades de Policía Xudicial da Garda Civil de Pontevedra e A Coruña esclareceron o asalto que sufriu unha octoxenaria da parroquia de Tomeza a noite do 23 de novembro. Foi no marco dunha investigación na que se logrou deter a catro integrantes dun grupo criminal, aos que atribúen este roubo e outros cometidos en Paredes (Vilaboa), Arcade (Soutomaior), Sanxenxo e as localidades coruñesas de Cedeira e Pontedeume.
Os detidos, todos de nacionalidade española, son tres veciños de Arcade e un da Coruña, de modo que as detencións se realizaron nas dúas provincias galegas. Teñen entre 24 e 53 anos e están acusados dos delitos de roubo con violencia, roubo con forza, tenza Ilícita de armas de fogo, detención ilegal e resistencia grave aos axentes da autoridade.
Tras ser postos a disposición dos xulgados de Instrución números 2 e 3 de Pontevedra, tres dos detidos ingresaron no centro penitenciario da Lama e nun cárcere da Coruña. Os responsables da investigación puideron constatar que algúns xa tiñan antecedentes policiais por feitos similares.
A Garda Civil detén catro personas e tres delas ingresaron en prisión
Os detidos formaban parte dun grupo criminal dedicado á comisión de roubos con violencia en vivendas habitadas. A investigación que derivou na súa detención comezou a principios do mes de ctubre e logrou determinar que en varios dos feitos cometidos se repetía o mesmo patrón delituoso: roubos cometidos a altas horas da madrugada, cando as vítimas estaban no interior das vivendas.
Os asaltos producíanse con especial violencia, ademais de recorrer case sempre ás ameazas de morte dirixidas ás vítimas ou aos seus familiares, dos que coñecían algúns detalles da súa vida. O diñeiro e as xoias eran o seu principal botín e as victimas adoitaban quedar atadas e amordazadas antes de que os asaltantes deixasen o domicilio. Os agora imputados utilizaban armas de fogo e porras eléctricas para ameazar os moradores das casas.
Con autorización xudicial realizáronse rexistros domiciliarios nos que se lograron intervir gran cantidade de obxectos provenientes dos roubos e medios de ocultación tales como pasamontañas, unha careta de plástico que recoñeceu unha das vítimas, unha porra eléctrica, tres armas de fogo, dúas pistolas e unha escopeta de canóns recortados. No rexistro que se levou a cabo nos vehículos que utilizaban os agora detidos tamén descubríronse obxectos como luvas, pasamontañas, pancas e lanternas.
Relacionadas:
-
Deteñen en Sanxenxo e Pontevedra cinco rumanos dunha rede dedicada aos roubos en vivendas e naves
Por Natalia Puga |
-
Tres encarapuchados amordazan unha nena de 15 anos para roubar na casa dos seus pais
Por Redacción |
-
Asaltan de madrugada unha casa de Tomeza e deixan unha octoxenaria coas mans atadas
Por Natalia Puga |