Tres encarapuchados amordazan unha nena de 15 anos para roubar na casa dos seus pais
Por Redacción
Tres individuos encarapuchados asaltaron este xoves unha familia de Campelo, en Poio, levándose máis de 20.000 euros en ouro e outros 18.000 en efectivo.
Segundo informa a xornalista Águeda Piñeiro en páxinas do Diario de Pontevedra, o suceso tivo lugar sobre as 17:00 horas na vivenda familiar do mariñeiro Iago Tomé, cando este regresaba en coche á súa residencia.
Os asaltantes esperaron ata que a moza chegou á casa e desactivou a alarma. Mentres un dos cacos esperaba no coche, os outros dous individuos abordaron a rapaza tapándolle a boca mentres irrompían no interior da casa.
"Dame o ouro do teu pai e mais os cartos", berráronlle
"Dame o ouro do teu pai e mais os cartos", berráronlle. Os ladróns se preocuparon por sacarlle o teléfono móbil á rapaza. E aínda que nun principio a vítima tratou de resistirse, finalmente desvelou o lugar no que se encontraban os obxectos de valor e o diñeiro. Unha vez que colleron o seu botín, os asaltantes chamaron o seu compañeiro para fuxir do lugar.
Tan pronto foi liberada a rapaza chamou á casa de en fronte onde viven os seus avós e estes alertaron ao veciño, que é policía local, quen advertiu a Garda Civil.
Aínda que os efectos substraídos teñen gran valor, na familia asaltada trasladaron a súa preocupación pola terrible experiencia sufrida pola filla, que horas despois do asalto seguía moi afectada.