O Valedor do Pobo estuda as críticas do Concello da Lama ao voceiro do PSOE na web oficial
Por Redacción
O Valedor do Pobo abriu unha investigación para estudar as críticas realizadas polo Concello da Lama e o seu alcalde, Jorge Canda, ao voceiro do grupo municipal do PSdeG-PSOE, Enrique Vaqueiro, a través da páxina web oficial.
Vaqueiro remitiu unha queixa ao Valedor queixándose de que na páxina web do Concello da Lama, o alcalde colgou durante os últimos meses notas de prensa dirixidas a criticar a xestión da oposición, particularmente en casos como os recursos presentados por Vaqueiro ante a Xerencia Provincial de Catastro ou a mobilización veciñal polos roubos en Xesta, Seixido e Antas.
Nos últimos días tivo resposta. O Valedor comunicoulle que a dá por admitida ao entender que reúne os requisitos formais recollidos no artigo 18 da Lei do Valedor do Pobo. En consecuencia, o organismo público inicia as "actuacións oportunas ante o Concello da Lama".
En concreto, o Valedor requiriu o Concello que no prazo de 15 días lles facilite información sobre o problema que motivou a súa queixa e comunicoulle a Vaqueiro que tan pronto como reciba o preceptivo informe que ten que remitir o Concello se poñerán en contacto con el.
Tras recibir esta notificación, o voceiro socialista valora que "é o lóxico" que se admita a queixa, pois "a páxina web municipal é propiedade do Concello da Lama e non é un escaparate do alcalde para criticar a oposición. Se quere ter maior repercusión das súas críticas á xestión do grupo socialista que se monte un blog persoal, se é que o sabe facer,".