Eulen responsabilizarase da seguridade do Museo por un período de 2 anos
Por Redacción
A Xunta de Goberno da Deputación adoptou, na súa reunión deste venres, dúas medidas orientadas a garantir a seguridade na Administración Provincial. Así, aprobouse a adxudicación do servizo de seguridade e vixilancia do Museo de Pontevedra, da Escola de Canteiros e do centro Príncipe Felipe á empresa Eulen Seguridad S.A.
O contrato terá unha vixencia de dous anos e conta cun orzamento de 1,5 millóns de euros, a razón de 750.175,80 euros anuais.
Boa parte deste orzamento destínase aos diferentes edificios e salas do Museo, cun investimento de 1.197.900 millóns para os dous anos. O custe deste servizo obedece ás propias características do Museo, tanto polo número de edificios como polas pezas que custodia.
SEGUROS
Ademais, acordouse a prórroga dos contratos de seguros por un ano, cun importe total de 169.298,44 euros. Neste sentido, cómpre lembrar que o agrupamento dos diferentes seguros, realizada en 2011, permitiu aforros de ata o 43% nas primas.
Así, neste momento a Deputación ten contratadas 5 pólizas de seguro (responsabilidade civil patrimonial; seguro todo risco de danos materiais; seguro de obras de arte; seguros de vehículos e maquinaria e seguro de accidentes para o persoal) que agrupan a todo o persoal, bens e dereitos da Administración Provincial, mentres que ata 2011 había múltiples pólizas por cada tipo de risco cuberto (por exemplo, en seguros de danos materiais había 20 pólizas diferentes; 4 de responsabilidade civil, 4 de vehículos e maquinaria, 5 de accidentes).
Agrupalos supuxo aforros que oscilaron entre o 36% do seguro de accidentes e o 43% dos seguros de responsabilidade civil. Tamén se acadou un aforro do 16% no seguro de obras de arte, que asegura a colección permanente do Museo de Pontevedra.
Os seguros renovados heste venres son os seguintes:
- Responsabilidade Civil: 49.000 euros
- Todo risco danos materiais: 58.159,54 euros
- Vehículos e maquinaria: 40.520 euros
- Accidentes de empregados: 21.618,90 euros