Setga deseña un sistema para avaliar en tempo real os consumos eléctricos dunha cidade
Por Oskar Viéitez
A empresa pontevedresa Setga lidera o proxecto "Zero Emissions City" no que participan como socias as firmas Serviguide Consultoría, Bahía Software, Tecnoloxías Plexus e Sistemas Audiovisuais Itelsis, así como a Universidade de Santiago de Compostela.
O xerente da firma, Ángel González Calvo e os responsables de relacións institucionais e produción de Setga, Iago Barbeito e Jesús Saavedra presentaron este proxecto de investigación no que se investiron 729.418,47 euros dos que o 60% corresponderon a axudas autonómicas.
Trátase dun sistema de avaliación en tempo real dos consumos de enerxía dos diferentes sistemas de demanda para poder actuar a partir do balance da pegada de carbono como un indicador de xestión, información e análise das accións encamiñadas a mellorar a eficiencia e a redución de consumos.
O obxectivo do proxecto é, segundo apuntou González Calvo, "dotar os municipios dun instrumento de control de desempeño enerxético e ambiental, así como favorecer o control exhaustivo dos niveis de demanda enerxética usando redes de dispositivos de medición".
De feito, esta iniciativa, que suporá o deseño dun hardware e un software, permitirá aos municipios coñecer os seus niveis de emisións en transporte e iluminación e implementar medidas para a súa redución co obxectivo de facer cidades máis sostibles.
Setga é unha compañía internacional baseada na innovación e no alto valor tecnolóxico. Conta con 60 traballadores, 14 deles, enxeñeiros formados nas universidades galegas, instalados en dúas naves, unha de 8.000 e outra de 10.000 metros cadrados. Exporta o entre o 20 e o 30% da súa produción, especialmente a Holanda, Alemaña, Grecia, Portugal, Kuwait, Dubai, Abu Dhabi, Catar, Israel, México, Costa Rica e Chile.