Operación contra o narcotráfico con varios detidos en Arousa e o Salnés
Por Oskar Viéitez
Axentes pertencentes ao Equipo Contra o Crime Organizado da Garda Civil (ECO) desenvolveron este domingo varias intervencións nas comarcas de Arousa e do Salnés nun operativo relacionado co narcotráfico.
Segundo fontes da investigación practicáronse tres detencións nas localidades de Sanxenxo, Cambados e Vilanova de Arousa. A operación continúa aberta e non se descartan novos arrestos.
Estas mesmas fontes sinalaron que as actuacións se estenden a outros puntos de fóra de Galicia.
A intervención máis rechamante tivo lugar o domingo, sobre as 14:00 horas nunha casa da Carabuxeira, en Sanxenxo. Varios axentes cos seus rostros cubertos con pasamontañas detiveron unha persoa e rexistraron o seu domicilio durante varias horas nun despregamento no que participaron varias unidades da Garda Civil, algunhas delas camufladas.