A plataforma cidadá 'Xuntos' denuncia a María Ramallo ante a Fiscalía
Por Redacción
A plataforma cidadá 'Xuntos si se puede' acaba de presentar unha solicitude formal de investigación contra a alcaldesa de Marín, María Ramallo, "por feitos que poderían cualificarse como tráfico de influencias, e mesmo posible malversación de fondos, ou por calquera outro delito que a fiscalía puidese determinar" durante a súa etapa como presidenta da Autoridade Portuaria de Marín.
Os feitos aos que se refire esta solicitude, están relacionados cos recheos "ilegais" do Porto de Marín, que o Tribunal Supremo e o Tribunal Superior de Xustiza de Galicia xa mandaron derrubar.
Esta plataforma cidadá chama a atención da fiscalía sobre "o custo inxustificado" que ao seu xuízo supuxo unha decisión de María Ramallo, que "un mes antes de ser cesada no seu cargo de presidenta da Autoridade Portuaria realizou un poder notarial 'con carácter de urxencia', que outorgaba 'plenos poderes' a un bufete de avogados da Coruña, cando dispoñía de defensa legal por parte da Avogacía do Estado", sinalan nun comunicado distribuído entre os medios.
Carlos González, en representación desta plataforma cidadá sinala que ven con "preocupación" que un xestor "poida xogar cos impostos de todos os cidadáns contratando os servizo dunha empresa externa á administración, cando xa ten cuberta a devandita actividade profesional co persoal propio da administración, e moito máis grave que isto se realice sen ningún tipo de control, dilapidando o diñeiro público, posto que o devandito bufete, ademais, non cumpriu con profesionalidade o encargo de defender os dereitos dos cidadáns de Marín".
"Nós queremos saber por que", insisten. Ademais queren saber cal é a responsabilidade de "esta posible malversación do diñeiro público e tráfico de influencias", do director do Porto, Navarro Veroz e o secretario, Navarro Bernabeu, "posto que este poder foi utilizado durante moito tempo pola autoridade portuaria despois do cesamento de Ramallo, sen ser ratificado ante o Consello de Administración e sen haber concurso público".
Entre os asuntos máis destacados nos que participa 'Xuntos si se puede', esta plataforma cidadá xa levou ante os tribunais o alcalde de Vigo, Abel Caballero, por supostos enchufes; contra o ex ministro de Fomento, José Blanco, por "neglixencia" no accidente de Angrois.
RESPOSTA DA ALCALDESA
Tras ter coñecemento da denuncia a través dos medios de comunicación, a aldesa de Marín expresou mediante un comunicado que "é falso que se outorgará un poder notarial para a defensa xurídica do Porto relativo á sentenza dos recheos portuarios".
María Ramallo ponse a disposición de Fiscalía e os xulgados e avanza que "me reservo as accións xudiciais que sexan precisas para que esta acusación falsa non quede impune".