María Ramallo denuncia a Plataforma "Xuntos sí se puede" por un grave ataque á súa honra
Por Redacción
A alcaldesa de Marín, María Ramallo, dirixiu un escrito á Fiscalía de Pontevedra anunciando accións legais contra o colectivo "Xuntos sí se puede", que a denunciou por presunto tráfico de influencias e malversación de fondos públicos, durante a súa etapa como presidenta do Porto de Marín.
No seu escrito a alcaldesa expresa o seu desexo de que se ordenen as oportunas dilixencias "para os efectos do esclarecemento dos feitos e a pesar da inexistencia de feito punible algún, pois todas as afirmacións que se salientan son falsas, non só no seu contido, senón tamén no sentido ou finalidade que son expresadas".
ÿ dicir, nega rotundamente que un mes antes de ser cesada no seu cargo de presidenta se outorgará un poder notarial a un bufete de avogados da Coruña, para a defensa xurídica do Porto, polo que entende que a solicitude formal de investigación presentada pola plataforma Xuntos é unha denuncia falsa. A plataforma cidadá sinalou uns feitos que entenden que "poderían cualificarse como tráfico de influencias, e mesmo posible malversación de fondos, ou por calquera outro delito que a Fiscalía puidese determinar" xa que a Autoridade Portuaria dispón de defensa legal por parte da Avogacía do Estado.
"As afirmacións así denunciadas e difundidas supoñen unha imputación falsa cara á miña persoa"
O escrito da alcaldesa insiste en que "as afirmacións así denunciadas e difundidas supoñen unha imputación falsa cara á miña persoa da autoría de presuntas actividades ilícitas, que nin son tales, nin, de selo, poderían serme atribuídas" e acompaña na súa denuncia María Ramallo tres copias dos textos publicados en PontevedraViva, Diario de Pontevedra e La Voz de Galicia.
Sinala ademais que esta imputación ten maior transcendencia cando se realiza coa "expresa finalidade" de cuestionala non só de xeito persoal senón tamén o cargo que actualmente desempeña como alcaldesa de Marín "con todo o menoscrédito que carrexa tamén para a institución" cun aparente respaldo dunha agrupación de cidadáns cuxa preocupación é erradicar a corrupción, segundo pon de relevo no manifesto de Xuntos "o que os dota de maior credibilidade cara aos posibles lectores".
Considera a alcaldesa que todo iso "dana considerablemente a imaxe e credibilidade" tanto pública coma privada, da súa persoa como denunicada e "supoñen un grave ataque á honra".
Ramallo pide que no transcurso da investigación que leve a cabo a Fiscalía, se observe e protexa "escrupulosamente" os dereitos e garantías que ten recoñecidos polo ordenamento xurídico como denunciada, o que supón que se lle comunique de xeito inmediato a apertura da investigación, se é o caso, ou o arquivo desta "co fin de poder exercitar de xeito inmediato as accións penais que me asisten".