Sanxenxo abre o prazo para renovar os permisos de venda ambulante nos mercados
Por Redacción
Os vendedores ambulantes que pretendan seguir exercendo a súa actividade nos mercados de Baltar e Vilalonga, así como aqueles profesionais que desexen incorporarse a estes recintos, terán un mes de prazo para entregar as súas solicitudes. Así o confirmou este martes o concelleiro de Economía, Comercio e Emprego, quen apuntou que o período de presentación de renovacións e peticións novas comezará o próximo día 1 e se estenderá ata o 30 de novembro.
Os interesados poderán, pois, achegar a instancia correspondente, ademais da documentación requirida, no Rexistro Xeral do Concello de Sanxenxo, en horario de 9.00 a 14.00 horas de luns a venres e de 9.00 a 13.00 os sábados.
Para dar o visto e prace á renovación, a Administración local demandará como mínimo que a solicitude sexa presentada dentro do período establecido, que o vendedor teña en regra a documentación, que careza de débedas pendentes no que ao pagamento da taxa municipal por ocupación de vía pública se refire, e que non incumprise o número de faltas de asistencia determinado no Regulamento de Mercados en relación á perda do posto.
Dende o departamento de Mercados incidiron en que as solitudes presentadas máis alá do prazo sinalado non serán atendidas, quedando fóra do mercado para o próximo ano.
BANCADAS DOS MERCADOS DE ABASTOS
A Concellaría de Economía, Comercio e Emprego está a levar a cabo tamén a renovación das autorizacións das bancadas dos Mercados de Abastos Municipais de Sanxenxo, Portonovo e Vilalonga. Neste caso, os praceiros deben presentar a fotocopia do DNI, o xustificante da alta no IAE e de estar afiliado á seguridade social ou os tres últimos recibos de autónomos e o carné de manipulador de alimentos.
Dende o departamento local de Mercados apuntaron ademais que os vendedores que desexen participar nesta actividade poderán solicitalo durante o mes de novembro.
Relacionadas:
-
Sanxenxo investirá máis de 21.000 euros na reforma do seu mercado municipal
Por Redacción |
-
Renovan a autorización para o mercado de Baltar a 176 vendedores ambulantes
Por Redacción |
-
Autorizan 199 ambulantes para instalar postos de venda no mercado de Baltar
Por Redacción |
-
201 ambulantes queren renovar a súa autorización no mercadiño de Baltar
Por Redacción |