Está garantida a calidade das augas da praia fluvial do Lérez?
Por Redacción
O presidente do Partido Popular local, Jacobo Moreira, presentou unha pregunta no Parlamento Galego sobre a calidade das augas da praia fluvial do Lérez reclamando información sobre os motivos polos que a Consellería de Sanidade exclúe a praia fluvial do programa de análise da calidade das augas nas zonas de baño de Galicia.
En 2012 e en 2013, a praia recibira o cualificativo de "insuficiente" por parte da Xunta de Galicia. Moreira preguntou ante o Parlamento por se o Concello de Pontevedra ten obriga de informar os usuarios acerca da calidade da auga da praia fluvial.
"A calidade das augas está garantida", asegura Anxos Riveiro
A esta solicitude respondeu a concelleira de Medio Ambiente, Anxos Riveiro, que indicou que lle parece incrible que Moreira se interese tan tarde sobre este tema. Asegurou, ademais, que a calidade das augas está garantida porque se realizaron analíticas propias e esa información aparece reflectida na caseta dos socorristas.
A concelleira sinalou que aqueles malos resultados das análises de 2012 e 2013 se debeu a unha vertedura concreta relacionada con obras que se realizaban nunha parte máis elevada da canle do río e debida tamén ás obras da AVE.
O motivo de que non se realizasen as análises en 2014 por parte da Xunta débese aos protocolos que segue a propia Consellería de Sanidade. "Somos os primeiros interesados en que a xente utilice a praia do Lérez nas mellores condicións", aclarou para tamén adiantar que en 2015 se retomarán as analíticas da administración autonómica. "Supoño que xa llo explicarán a el", indicou Anxos Riveiro en referencia á pregunta parlamentario do representante do Partido Popular.