Denuncian por incumprir o horario de peche o local onde se orixinou a pelexa de Martín Gaite
Por Natalia Puga
A Policía Nacional obrigou este mércores ao peche do pub-karaoke Makumba, foco da pelexa multitudinaria que se produciu na noite do luns ao martes na rúa Martín Gaite cun policía ferido. Os axentes regresaron ao local, situado na rúa Perfecto Feijoo, e pechárono por incumprir o horario de peche.
Fontes policiais indicaron que unha patrulla acudiu ao local sobre as 5.50 horas deste mércores e, ao comprobar que seguía aberto a pesar de superar a hora límite permitida, obrigou os responsables deste a que o desaloxasen e pechasen as portas.
Ademais, os axentes levantaron unha acta cun proposta de sanción administrativa por incumprir o horario de peche. Esta proposta deberá ser tramitada pola Subdelegación do Goberno de Pontevedra e pode derivar no peche preventivo do establecemento.
Por outra parte, o Xulgado de Garda deixou en liberdade á muller detida no transcurso da pelexa por golpear un axente cunha botella na cabeza. O policía tivo que ser atendido nun centro sanitario, pero recibiu a alta e este mércores xa se incorporou á súa quenda de traballo habitual.
As policías Nacional e Local acudiron a primeira hora da mañá deste martes á rúa Padre Martín Gaite ante o aviso dun particular que alertou dunha pelexa multitudinaria. Os implicados declararon que a liorta se iniciou no interior do pub Makumba por un "problema de celos" e continuou no exterior cun enfrontamento entre dúas cuadrillas no que finalmente foron identificadas 11 persoas de nacionalidade española, venezolana, dominicana e colombiana.