A alcaldesa de Sanxenxo reitera os afectados polas axudas familiares que se incluirán no presuposto 2015
Por Redacción
A alcaldesa de Sanxenxo, Catalina González, reiterou este luns o seu compromiso de incluír no presuposto correspondente ao exercicio 2015 as contías pendentes de pagamento das axudas a familias con fillos menores de 3 anos ao seu cargo do ano 2010 e aquelas dedicadas a sufragar o material escolar do curso académico 2011-2012.
Catalina González mantivo un encontro a primeira hora do luns cun grupo de afectadas que solicitaron unha reunión para interesarse pola situación, especialmente por que acontecerá cando se produza un cambio de goberno o próximo ano.
A este respecto, a rexedora local informounos de que se trata dun expediente municipal resolto polo que seguirá o seu curso independentemente de quen estea á fronte do Executivo local.
E é que, tal e como xa adiantou González no último pleno ordinario e segundo lle trasladou tamén aos voceiros dos afectados, os escollos legais que existían ata o momento para facer fronte ás subvencións foron xa solucionados xa que os últimos informes xurídicos avalan que as contas de 2015 reflictan nominativamente a axuda a cada unha das familias.