Máis de 180 desempregados poderán beneficiarse a partir de outubro do II Plan de Emprego Local
Por Alejandro Espiño
Un total de 182 pontevedreses en situación de desemprego poderán beneficiarse do novo Plan de Emprego que impulsa o Concello de Pontevedra. O importe total do proxecto é de 210.000 euros, dos que 150.000 corresponden á partida dispoñible no orzamento municipal e outros 60.000 á inxección realizada con cargo á última modificación de crédito aprobada no Pleno, segundo destacou a concelleira de Promoción Económica, Carlota Román.
Supón un incremento substancial con respecto ao plan anterior, que contaba cun orzamento de 90.000 euros e deu emprego a 77 persoas.
Este novo Plan de Emprego local botará a andar durante o mes de outubro e terá unha duración de tres meses e réxime de media xornada. As becas, que ao igual que o ano pasado teñen o carácter de prácticas, non supoñen relación laboral algunha nin co Concello nin coas empresas. Os bolseiros obterán unha asignación mensual de 375 euros e os custos laborais, así como os seguros de accidentes e de responsabilidade civil, correrán a conta do Concello.
O proceso de selección dos aspirantes a fará directamente o INEM, o que garante, segundo Carlota Román, un proceso "total y absolutamente transparente".
As persoas interesadas deben dirixirse inmediatamente ás oficinas do Servizo Galego de Colocación para manifestar o seu interese en seren incluídos nas listaxes que remitirán ao Concello. Os requisitos para participar na convocatoria pasan por estar empadroado en Pontevedra, ter cumpridos os 18 anos, estar desempregado e dispor de capacidade funcional para desenvolver as tarefas habituais da ocupación que se solicita.
A partir da relación recibida, que incluirá tres aspirantes por cada posto para que haxa suplentes en caso de que algún deles renuncie á bolsa, valoraranse aspectos como ter menos de 30 anos ou máis de 50, estar na busca do primeiro emprego, levar parado entre 2 e 5 anos ou, no seu caso, máis de 5 anos. Ademais haberá prazas para persoas con discapacidade e vítimas de violencia de xénero.
Finalmente, realizarase unha entrevista de selección para valorar a idoneidade dos perfís, porque Carlota Román avanzou que será un proceso "a la carta". ÿ dicir, cada bolseiro dirá cal é a súa especialidade e o Concello lle buscará unha empresa para realizar as prácticas, acorde coa súa formación. As empresas interesadas en colaborar con este plan pódense apuntar a través da páxina web do ILES. Non poderán ter despedido a ninguén nos últimos tres meses e comprometerse a non facelo durante a duración destas prácticas, "para evitar la picaresca".
A concelleira de Promoción Económica destacou que esta estratexia de propiciar prácticas directamente en empresas é dobremente acertada, ao poñer a disposición das empresas unha forza laboral adicional e ao ofrecer tamén vías de formación laboral e alivio económico para os beneficiarios das becas "que pueden compaginarla con cargas familiares". Sinalou que, no proxecto ILES, un 60% das persoas que fan prácticas nas empresas, acaban logrando un contrato laboral nelas.
Por último, Carlota Román sinalou que este Plan de Emprego foi apoiado no seo do Consello Económico e Social (CES) e recordou que a súa concellería foi das entidades pioneiras en organizar becas para prácticas en empresas, fórmula que considera máis axeitada que a contratación de persoas para traballos nas administracións públicas.
Relacionadas:
-
O PP solicitou unha comisión informativa polo 'impago' das bolsas municipais de emprego
Por Redacción |
-
O Plan de Emprego municipal refórzase con outros 51 traballadores
Por Redacción |
-
Un plan de emprego local "a pesar da Xunta"
Por Oskar Viéitez |
-
Novo plan de práctica laboral para 200 titulados
Por Redacción |
-
400 mozos titulados comezan o 1 de outubro a traballar como bolseiros en empresas da provincia
Por Redacción |
-
Só quedan 16 prazas para participar nos itinerarios formativos do ILES
Por Redacción |
-
Os 77 becarios do Plan de Emprego municipal incorpóranse este martes aos seus postos de traballo
Por Redacción |
-
A Concellería de Promoción económica crea un plan de emprego con 77 bolsas de 350 euros mensuais
Por Redacción |