Os alumnos de Belas Artes intervirán en espazos públicos de Pontevedra con motivo do 25 aniversario da Facultade
Por Oskar Viéitez
O decano da facultade de Belas Artes, Juan Carlos Meana, adiantou que con motivo do 25 aniversario desta titulación en Pontevedra, estase a traballar nun proxecto para a intervención en diversos espazos públicos da cidade.
A concelleira de Cultura, Anxos Riveiro, explicou que este aniversario é "un feito digno dunha gran celebración" e sinalou ademais que "estamos a vivir unha das mellores xeracións de alumnos e isto ten que repercutir na nosa cidade".
O proxecto no que traballan ambas as dúas institucións persegue que a cidade "acolla a todos estes artistas, os actuais e os que xa pasaron", dixo a concelleira.
A xeito de proba, durante o pasado curso académico, a facultade empezou con algunhas pequenas accións no pavillón universitario e un muro traseiro dun edificio en Monte Porreiro. "Agora queremos celebrar que a facultade está moi viva, que ten grandes profesionais, que a formación que reciben en Pontevedra é excepcional e iso merece, que menos, unha celebración", apuntou Anxos Riveiro, destacando a ambición do proxecto no que traballan.
Serán intervencións con vocación de permanencia, "que ayuden a la alegría y el bienestar de los vecinos", afirmou o decano.
O anuncio fíxose no transcurso dunha rolda de prensa na que o Concello de Pontevedra e a Universidade de Vigo presentaron o catálogo "Do final e do comezo", que recolle a terceira edición da exposición que con ese mesmo título mostra unha selección dos traballos dos alumnos recén graduados na facultade de Belas Artes.