O goberno de Sanxenxo mantén que a construción do novo colexio de Vilalonga é prioritaria
Por Redacción
O goberno local de Sanxenxo afirmou que a construción do novo Colexio CEIP Cruceiro, na parroquia de Vilalonga, é unha prioridade absoluta para este Goberno, indicou a alcaldesa Catalina González. Por este motivo, a rexedora considera que non se vai atrasar" o proceso de expropiación "nin un segundo" porque xa se pechou o período de negociacións para conseguir as cesións necesarias sen alcanzar acordo con algúns propietarios.
Iso si, Catalina González agradeceu a vontade de moitos titulares por vender as súas parcelas ao Concello de Sanxenxo, "conscientes da importancia de construír o novo colexio", pero segundo aalcadesa, outros non quixeron aceptar a oferta e dáse a circunstancia de que posúen terreos imprescindibles para levar adiante o proxecto.
A administración local xa cedera en 2009 un total de 11.133 metros cadrados á Consellería de Educación para este proxecto pero as parcelas resultantes desta cesión son insuficientes para a construción do novo colexio con todos os seus servizos. Por este motivo é necesaria a adquisición de máis terreos a través da expropiación ao non ter chegado a acordo nas negociacións previas. Trátase de 22.644 metros cadrados distribuídos en 35 parcelas.
A alcaldesa de Sanxenxo recordou que agora o prezo é froito das avaliacións técnicas e os afectados poderán presentar as alegacións que consideren oportunas.