Despregamento de medios en Cuntis para apagar un incendio nunha nave de pneumáticos
Por Redacción
Un incendio nunha nave de pneumáticos en Cuntis mantivo en alerta boa parte da madrugada aos servizos de emerxencias. A primeira alerta recibiuse ás 2.00 horas da madrugada e ata as 5.30 horas o lume non se considerou sufocado.
A nave está situada na estrada N-640 no polígono da Ran de Cuntis, á altura do cruzamento que comunica con Moraña. Por motivos que se descoñecen, empezou a ader na cabina de pintura. Un amplo despregamento de medios conseguiu controlalo e desaloxar os coches situados no recinto para evitar danos maiores. Unha vez sufocado, realizáronse tarefas de arrefriado da nave con escuma.
Os primeiros en acudir ao lugar foron os voluntarios de Protección Civil de Cuntis, pero as lapas estaban fóra de control, de modo que recibiron reforzos. Hatsa o lugar desprazáronse voluntarios de Protección Civil de Caldas, o Grupo de Emerxencias Supramunicipais (GES) da Estrada, os Bombeiros do Salnés e medios da Consellería de Medio Rural e o Concello de Cuntis.
Coa axuda dunha escavadora municipal lográronse separar as rodas das lapas e, desta forma, facilitar a extinción, pois os pneumáticos e o seu poder de combustión era o principal perigo. Finalmente, a nave sufriu menos danos materiais dos esperados, pero si resultou danada a parte superior da zona do taller de pintura na que se iniciou o lume.