Eliminan dúas verteduras de augas residuais de casas particulares a ríos de Moraña e Portas
Por Redacción
Augas de Galicia enmendou nos últimos días dúas verteduras de augas residuais procedentes de vivendas particulares que estaban a afectar a un río e un regato dos municipios de Moraña e Portas.
Segundo informou a Consellería de Medio Ambiente, Territorio e Infraestruturas, unha das verteduras eliminada procedía dunha vivenda particular do lugar de A Barosela, no Concello de Moraña. Os técnicos do Plan de Control de Vertidos (PCV) de Augas de Galicia, nunha inspección rutineira, detectaron a presenza de aportes contaminantes por infiltración cara ao río Agra procedentes da vivenda.
Tras a detección de dito punto de vertido, o persoal de Augas de Galicia, nunha inspección conxunta con representantes do Concello, solicitaron a estes un plan de actuación para eliminar dito aporte. Recentemente, xirouse unha nova inspección na que se verificou que o titular procedeu a conectar as augas residuais da vivenda cara á rede de saneamento municipal, instalada na zona de A Barosela, quedando deste xeito subsanado o vertido contaminante cara ao Dominio Público Hidráulico.
No caso de Portas, o vertido detectouse no lugar de Piñeiro. Segundo puido comprobar o persoal inspector, tratábase das augas residuais procedentes do pozo negro dunha vivenda particular e que ían parar ao terreo próximo a un regato innominado do lugar. En consecuencia, trasladáronse os feitos ao Concello e requiriuse ao particular para que puxese fin aos vertidos contaminantes.
Nunha última inspección de comprobación verificouse que o titular procedeu á instalación dun equipo de depuración, ao non existir rede de saneamento na zona, para o tratamento das augas asimilables a urbanas (aseos, lavadora e cociña), quedando deste xeito subsanados os vertidos contaminantes cara ao Dominio Público Hidráulico.