Imputan un veciño de Moraña por causar un accidente ao conducir baixo a influencia de drogas
Por Redacción
O Subsector de Tráfico da Garda Civil de Pontevedra imputou a M.M.P., de 35 anos de idade e veciño de Moraña, como suposto autor dun delito contra a seguridade vial ao conducir baixo a influencia de substancias estupefacientes.
Durante a primeira semana de agosto producíase un accidente na estrada PO-305 (Saiar-Vilagarcía), no punto quilométrico 0,900 e termo municipal de Caldas de Reis, cunha colisión frontal entre dous turismos, un Suzuki e un Opel, que se saldou con dúas feridas leves.
Segundo a Garda Civil de Tráfico, o accidente prodúcese como consecuencia da invasión da vía por parte do condutor do Suzuki, debido a unha velocidade inadecuada. Cando os axentes proceden á identificación do condutor observan que presentaba síntomas evidentes de poder encontrarse baixo a influencia de substancias estupefacientes procédese á realización da proba en drogo-test, dando positivo en consumo de cannabis.
A Garda Civil procedeu á súa imputación e á instrución das correspondentes dilixencias que foron entregadas no Xulgado de Instrución número dous de Caldas de Reis.