2.000 sinaturas piden o uso náutico-deportivo da nave almacén do Porto
Por Redacción
Máis de 2.000 sinaturas e o apoio do BNG, os clubs deportivos de remo e piragüismo de Marín e as asociacións de pesca deportiva Tenlo e Amigos dos Rapaces apoian a petición de que a nave almacén situada no Porto de Marín e próxima ao paseo marítimo Alcalde Blanco sexa cedida para uso náutico-deportivo.
Todos os colectivos que apoian a reivindicación compareceron este xoves en Marín para explicar que dende que no mes de xuño o BNG presentou unha moción para reclamar o uso público desta nave en canto quede libre da actividade actual o apoio no municipio foi en aumento.
A moción presentada polo BNG será aprobada no Pleno deste venres, pois os nacionalistas conseguiron o compromiso do grupo de goberno do PP para apoiala. Ante este logro, a portavoz do BNG, Pilar Blanco, sinalou que a pesar de que "este é só o inicio" dende o seu partido séntense "satisfeitos" e están dispostos a "seguir pelexando" por un proxecto porto-cidade que asegure o futuro de actividades deportivas tan emblemáticas e unidas a Marín como o remo, o piragüismo e a pesca deportiva.
Segundo Pilar Blanco, piden que a nave non sexa demolida unha vez quede libre do uso actual, que é o de almacenar bobinas de aceiro. A empresa que actualmente ten a concesión, Pérez Torres Marítima S.L, xa ten solicitada a licenza para o traslado da súa actividade á zona de servizo do Porto, por iso o BNG insta ao Pleno da Corporación e ao Goberno local a que en canto quede libre deste uso reclame a concesión do uso da nave para poder rehabilitala e destinala a albergar aos clubs e asociacións de Marín vinculados a actividades náutico deportivas.
O presidente do Club de Remo Ría de Marín, Alfonso Fernández, explicou que na actualidade non poden desenvolver a súa actividade con normalidade porque "as restricións por parte da Autoridade Portuaria son cada vez maiores", mentres que o presidente do Club de Remo Tambo, Luis Pesqueira, engadiu que os clubs presentan "urxentemente" de máis espazo porque "onde estamos non temos futuro".
Relacionadas:
-
O BNG de Marín tamén aposta por unha nave de deportes náuticos e promete máis apoio aos clubs
Por Redacción |
-
O Bloque proporá ao pleno que se desafecte unha nave do porto para uso deportivo
Por Redacción |
-
O BNG propón unha estratexia común Porto-Cidade para recuperar a fachada marítima
Por Redacción |