Colaboración entre o Concello e a Deputación para reparar os danos dos temporais en Marcón e Salcedo
Por Redacción
As negociacións iniciadas entre a Deputación Provincial e o Concello de Pontevedra tras os temporais do pasado inverno plasmaranse presumiblemente na reparación dos danos causados polas chuvias e o vento en dúas das parroquias do rural, Marcón e Salcedo. A Administración local rematou a redacción e presupostou dos proxectos que permitirán acometer a actuación e agora serán remitidos á institución provincial, encargada de financiar as obras.
O concelleiro de parroquias, Demetrio Gómez, presentou este martes os dous proxectos elaborados polo Concello, que consistirán en obras de mellora da seguridade vial e canalización de pluviais nos accesos a Ruibal (Salcedo) e Marcón por un importe de preto de 426.000 euros. Ata o momento non hai prazo de execución das obras porque antes terán que ser aprobadas pola Deputación.
Nas negociacións mantidas tras os temporais acordouse o tipo de obras que se acometerían, pero non se concretaran os detalles e Demetrio Gómez recoñece que "é máis caro do que se prevé na memoria". De todos os xeitos, non se prevé ningún problema de entendemento neste sentido, pois nas reunións previas houbo sintonía na necesidade de acometer as distintas actuacións para reparar os danos do inverno.
No caso de Salcedo, proxéctase a rehabilitación da estrada de acceso a Ruibal dende a rúa Rosalía de Castro, un quilómetro de vial no que se repararán os danos do temporal e aproveitarán para atender outras demandas do Conselo Parroquial de Salcedo. A actuación está valorada en 241.000 euros e implica a regulación do pavimento e dúas actuacións específicas: medidas de calmado do tráfico coa instalación de 'lombos' e mellora das canalizacións de pluviais.
En Marcón a actuación tamén afectará a un quilómetro de vial, neste caso, de acceso dende a rúa Camposanto e Pedra do Lagarto. Trátase, como en Salcedo, dunha estrada de plataforma única na que é necesario mellorar a seguridade vial e entre as obras previstas se inclúen a rehabilitación do pavimento, asfaltado, pintado e sinalización, todas consensuadas co Conselo Parroquial e cun presuposto de 184.645 euros.