92 cacharelas iluminarán a noite de San Xoán en Pontevedra
Por Redacción
Pontevedra festexará a noite de San Xoán cun total de 92 cacharelas repartidas entre as diferentes parroquias do rural e os barrios do centro urbano, todas elas impulsadas por asociacións e particulares que decidiron celebrar esta tradicional festa popular. Son as solicitudes que, durante os últimos días, se presentaron no Rexistro Municipal, requirimento previo para poder organizar unha delas.
No relativo ás condicións das cacharelas, terán que distar un mínimo de 15 metros de edificios e árbores, o diámetro máximo de zona de combustión da fogueira será de 4 metros de ancho cunha altura máxima de 2 metros, e nun área de diámetro similar ao pao central da fogueira non poderán concentrarse os asistentes á festa.
Os materiais a empregar na combustión serán leña, polas, toros de árbores e vellos materiais de madeira de calquera clase. Prohíbense os pneumáticos, plásticos, latas, botellas, materiais con P.V.C. en xeral, e similares, así como botar aerosois, aceites ou líquidos combustibles e calquera substancia explosiva. Lembran desde o Concello que un bote de aerosol, aínda vacío, pode orixinar unha explosión importante.
Ademais, prohíbense as cacharelas baixo tendidos eléctricos ou telefónicos, así como realizalas sobre vías públicas pavimentadas, xardíns ou zonas verdes en xeral; e os seus organizadores terán que acatar as normas ou instrucións que poidan ditar os axentes dos corpos da Policía Local ou Bombeiros.
O ano pasado as cacharelas de San Xoán en Pontevedra alcanzaron as 130, se ben se aceptaron tamén as solicitudes presentadas fóra de prazo.