Uns empresarios de Alicante fan unha oferta para adquirir Construcciones Crespo
Por Redacción
Atalanta Gestión, unha empresa da zona do Mediterráneo que se dedica á compravenda de bens inmobiliarios por conta propia, sería a principal interesada en adquirir Construcciones Crespo entre varias ofertas realizadas ao administrador concursal. Así o anunciaron os representantes sindicais na mañá deste mércores 18 afirmando que agardan a que, dentro dunha semana, a empresa de Alicante presente un plan de viabilidade para a empresa construtora.
A proposta desta entidade sería a de facerse co 100% do plantel, 84 traballadores na maioría dos casos con máis de 50 anos, a cambio dunha achega inicial de 6.000 euros e do 50% da masa concursal que, segundo afirmou Xaquín Agulla do sindicato CIG, podería alcanzar unha cifra apróximada de 650.000 euros.
Os sindicatos móstranse receosos ante esta oferta xa que temen que, detrás desta operación, a dirección de Construcciones Crespo realice unha "reformulación táctica" que remate desgastando o plantel. As sospeitas sobre esta entidade céntranse no feito de que non estea implantada en Galicia e que a súa oferta xurda xusto no momento de máis protestas por parte dos traballadores. Os representantes sindicais e responsables de Atalanta Gestión mantiveron un encontro no que a empresa solicitou información.
En todo caso, Xaquín Agulla entende que van estar pendentes desta evolución pero reclaman á Xunta de Galicia que non retire as obras que xa foran adxudicadas a Construcciones Crespo. Xa sucedeu cunha obra en Cuntis que a administración autonómica adxudicou a outra empresa e na actualidade, a entidade que se encontra en concurso traballa en obras na Gándara e Baiona. Agulla afirmou que solicitaron en dúas ocasións unha entrevista co delegado da Xunta en Pontevedra, José Manuel Cores Tourís, sen que recibisen unha resposta. "Máis que nunca necesitamos o apoio da Administración", afirmou o representante sindical. Finalmente, no mediodía deste mércores, Cores Tourís convou os traballadores a unha reunión este venres 20 ás 11.30 no edificio administrativo da Xunta.
Relacionadas:
-
Os empresarios de Alicante interesados en Construcciones Crespo renuncian a súa compra
Por Anxo Lourido |
-
O plantel de Construcciones Crespo pide a Cores Tourís que a Xunta lle manteña as obras adxudicadas
Por Redacción |
-
Adían o último encontro entre dirección e traballadores de Construcciones Crespo
Por Redacción |
-
Os traballadores cren que as contas ofrecidas por Construcciones Crespo non xustifican o peche
Por Redacción |