Alumnos de Belas Artes axudan a mellorar espazos do Hospital Provincial
Por Diego Espiño
Dous alumnos da Facultade de Belas Artes de Pontevedra protagonizaron senllas actuacións de mellora dos espazos do Hospital Provincial en busca de "humanizar" algunhas zonas de cara a pacientes e familiares.
Desta forma actuouse na área de paliativos e no hospital de día de psiquiatría.
No primeiro dos casos Guillermo Touceda interveu na sala de espera, que presentaba un aspecto gris, para que a través dun mural as persoas que alí se encontren "puedan evadir un poco los sentimientos y pensamientos que pueden tener en esos momentos complicados".
Pola súa banda Lucía Ferreirós centrou o seu traballo no centro de día de psiquiatría cun taller no que colaboraron os pacientes e persoal sanitario e que buscaba mellorar a harmonía do lugar e potenciar "los pensamientos positivos", porque segundo recoñeceu ela mesma "una sonrisa vale a veces más que cualquier otra cosa".
Este taller incluíu traballos de origami no que os usuarios elaboraron grúas de papel que finalmente foron instaladas en diferentes zonas do centro.
A intención, segundo explicou o xerente do Complexo Hospitalario Universitario de Pontevedra (CHOP) José Manuel González, é ampliar a iniciativa a outras zonas do hospital logrando así "espacios más acogedores para todos".
Na presentación destas actuacións tamén estivo presente o decano de Belas Artes, Juan Carlos Meana.