"Os medios de comunicación tenden a estigmatizar a moto"
Por Oskar Viéitez
A Plataforma Moteira para a Seguridade Vial foi invitada a presentar un relatorio no Parlamento Galego ante a Comisión non permanente de Estudo da Seguridade Viaria en Galicia. O presidente desta plataforma, Manuel Picón, acompañou o seu relatorio de varios informes, cos que apoiou a súa tese.
Manuel Picón sinalou que, ao seu xuízo, "o principal problema son as poucas medidas de protección nas vías, e ás que hai son nocivas pra os usuarios das mesmas. Sinais verticais ríxidos que son coitelas para quen teña a mala sorte de topar con elas" ou os sinais horizontais "verdadeiras pistas de patinaxe, ainda co bo tempo", pero sobre todo, as queixas dos moteiros centráronse nos quitamedos, "a gadaña asasina".
Por outra parte, Manuel Picón avogou pola necesidade de poñer en marcha campañas de sensibilización destinadas á prevención de sinistros no ámbito laboral e por revisar os baremos das indemnizacións, porque "sae moi barato ferir gravemente a unha persoa nun sinistro viario".
Suxeriu que as campañas de seguridade viaria se dirixan a todo tipo de vehículos, "pero tamén a todo tipo de usuarios, a calquera que utilice as vías públicas. E debe deixarse de estigmatizar aos vehículos de dúas rodas, vemos poucas campañas de sensibilización cara ao moteiro".
"Sempre facendo fincapié na peligrosidade e culpabilidade do moteiro, e todo iso debe cambiar"
Neste sentido "os medios de comunicación tenden a estigmatizar a moto, a criminalizar nun sinistro, deseguida lánzanse a inducir a gran cilindrada da moto, a velocidade, a idade do moteiro... sempre facendo fincapié na peligrosidade e culpabilidade do moteiro, e todo iso debe cambiar".
O presidente da Plataforma Moteira para a Seguridade Vial afirma que estatisticamente está comprobado que nos sinistros das motos, "nun porcentaxe do 70% a culpa é dun terceiro, pero claro, iso nos medios de comunicación non se di, porque non vende, e aí se está creando unha alarma e enviando unha mensaxe errónea".
Finalmente esta plataforma sinala a necesidade de disuadir ós condutores de risco mediante o control e vixilancia.