A mellor tapa de Galicia está en Pontevedra
Por Redacción
O restaurante La Fuga de Blas, de Pontevedra resultou galardoado co premio Destapa Galicia na categoría A Tapa de Aquí, coa creación mexillóns en tempura con mahonesa de cítricos.
No concurso, promovido por Coca-Cola en sete localidades de Galicia e coa colaboración de Turismo de Galicia a través do Centro Superior de Hostelería de Galicia participaron 169 establecementos, entre os que se seleccionaron 15 finalistas, cinco en cada categoría.
Concretamente na categoría Tapa de Aquí foron La Chula (A Coruña), Room (Pontevedra), Kuntshalle (Santiago), La Fuga de Blas (Pontevedra) e mais Pontetapas (Pontevedra).
En total recontáronse dez mil papeletas de persoas que disfrutaron das tapas e consumicións do concurso. Estes votos e mais os dos oito membros do xurado deron como resultado as tres distincións que recoñecen as creacións innovadoras e de calidade.
A directora de Turismo de Galicia, Nava Castro, recalcou o esforzo dos participantes no concurso e o seu interese por desenvolver iniciativas innovadoras que dotan de valor engadido ao destino.
Nava Castro resaltou que a gastronomía "é un potente elemento de atracción turística, un modo de compartir o destino e un dos mellores escaparates do bo facer dun territorio".