O comisario de seguridade atropelado na Subida Cidade de Pontevedra segue na UCI tres días despois
Por Redacción
O comisario de seguridade ferido nun atropelo durante a Subida Cidade de Pontevedra continúa, tres días despois, ingresado na Unidade de Coidados Intensivos (UCI) do Hospital Miguel Domínguez recuperándose das feridas sufridas.
Segundo informou o Hospital Domínguez, o home continúa a súa evolución normal tras ingresar en estado grave con traumatismos cranial, facial, torácico-abdominal e de pelve, con fracturas do maxilar inferior e seo maxilar esquerdo, e da á ilíaca esquerda, así como unha ferida a nivel de nocello e policontusións.
O home, Manuel Vázquez, foi intervido cirurxicamente na tarde deste martes polo doutor Diego Murillo Solís das lesións na mandíbula. O equipo médico practicoulle satisfactoriamente unha redución e osteosíntese da fractura mandibular inferior. A continuación, regresou á UCI para seguir tratamento.
O atropelo produciuse sobre as 11.30 horas do domingo na rotonda de accceso ao polígono industrial do Campiño. Uns minutos antes producírase un pequeno accidente que deixou un coche bloqueado na estrada e o ferido, xunto a outras persoas, estaba a axudar a retiralo para deixar libre a calzada. Nese momento, foi arremetido por outro dos participantes na proba automobilística, o piloto Manuel Senra.