Jorge Cubela, reelexido presidente local do PP de Cotobade
Por Redacción
Jorge Cubela saíu elixido como presidente do Partido Popular de Cotobade tras a celebración do III Congreso local no auditorio da Banda de Música de Tenorio ao ser avalada a súa candidatura e non se presentar unha alternativa. Na clausura do Congreso déronse cita tamén o secretario xeral do PP de Galicia, Alfonso Rueda, acompañado polo presidente provincial, Rafael Louzán.
Cubela, o alcalde máis novo de España, obtivo o aval de 221 afiliados do PP do seu concello que apoiaron a candidatura que encabezaba formada por un total de 36 persoas, das que 22 formará parte do Comité Executivo que saíu elixido neste Congreso. O vicepresidente será Carlos Boullosa, que na anterior executiva era secretario local, posto que agora ocupa Bruno Portela. O tesoureiro será José Cabanelas.
Segundo Jorge Cubela, o índice de renovación da nova executiva é dun 40%, cunha media de idade de 45 anos, un aspecto que o alcalde quixo destacar sinalando que nos últimos tempos, o partido está a experimentar unha renovación coa entrada de mozos afiliados.
O alcalde de Cotobade estivo arroupado polos alcaldes de Cerdedo, Campo Lameiro, Forcarei, A Cañiza, Marín, Ponte Caldelas, A Lama, Soutomaior e os portavoces populares de Pontevedra e Poio.